بتوعدني وتنساني
بليلة فرح
ودبلة تلم أسامينا
وموجة نلاعبها بكفوفنا
علي شط الحب ترمينا
تكفينا
تهنينا
وتوعدنا براحة البال
ومهرك ليا كام موال
بتوعدني بكام نجمة
وقمر الليل يغنيلي واسمي عليه
وحبك ليا زوادي
وحبابي عنيه
وتنساني
****
بتوعدني
بضحكاية وكف حنين
وتغزل الحرف ويايا برمش العين
وورد
وبسمة فوق حَمَار الخد
وحب من قبلي مشافهوش حد
وملهوش حد
وبتبنيلي للسما عتبات
وعروسة ف حضني بتغني
وحكاية مش راح تشبه الحكايات
وترجع تاني تنساني
ونتباعد ونتفرق
وننسي الحب لو شَرّق
ونقول يا حب ليه نشكي مرار الجرح
وليه نحتار
وليه نبعد وليه نختار
يكون الهجر تالتنا
وقلبي يشتكيك ليا
ودمعي بشفتي وجفني
وأقول أبعد
لكن روحي تخالفني
وارجعلك وانا مشتاق
وترجع تاني توعدني بكل جميل
وشمعة حب تنورلي ضلام الليل
ومن تاني
تسيبني لسهدي ويا حرماني
عشان أعرف
انك يدوب ترجع
عشان تبعد وتنساني
___________
أحمد الصعيدي
https://www.facebook.com/pages/%D9%83%D9%84%D8%A7%D9%85-%D8%A7%D9%84%D9%87%D9%88%D9%8A/218940224824320
صفحة كلام الهوي ( أحمد الصعيدي )
بالفيس بوك
وموجة نلاعبها بكفوفنا
ردحذفعلي شط الحب ترمينا
تكفينا
تهنينا
وتوعدنا براحة البال
ومهرك ليا كام موال
----------------------
جميل اووووى اووووى الكلام دا
والله جميله يا احمد
ردحذفمع انى مش بيستهوينى الشعر اللى بالعاميه
لكن بجد عجبنى
تحياتى لقلمك
المبدع دوما