الأربعاء، 30 مارس، 2011

كلمتين


من جمالك
من حلاوتك
.
من الحنان اللي ف عنيكي
.
شفت جنة
.
بتناديني
.
خدني شوق الحب ليكي
.
يا صبية
.
نور عنيه
.
بتعشق حلاوتك
.
وانتي حلوة ف كل عين 
.
واسمحيلي يا حبيبتي بكلمتين
.
مين يأمن
.
أو يبقي ضامن
.
من جمالك يمشي فين
.
يا بهية يا أم الشعر ليلي
.
والسمار شق النهار
.
والخدود ملمس حرير
.
والشفايف جمر نار
.
والورود الـ في ابتسامتك
تحكي أسرار المحار
.
كلمتين يا صبية
.
إمتي يهنالي الحوار
.
طال في درب الليل سفينتي
.
وطال عليا الانتظار
.
يا اللي ساكنة في برج عالي
.
ونسمتك فوق في العلالي
.
وضحكتك من بين نغمها
.
تطلع الألحان تلالي
.
اسمحيلي بكلمتين
.
حب عمري انتي ياللي
.
جايبة حبل النور بشاير
.
يا عود ريحان عطر عيداني
.
يا نسيم الحب طاير

هناك 10 تعليقات:

أحمد الصعيدي يقول...

فشلت أرحام الأمهات أن تلد من تستحق الحب


وجهة نظر خااااااااااصة

emymony يقول...

رائعه جدا
تسلم ايدك
وعجبانى وجهه نظرك جدا
بس عجبانى ف اسلوبها بس فكرتها مش صح الحب موجود بوجود الانسان لو مفيش انسان مفيش حب
لسه الامل موجود واكيد ف كتير يستحقوا الحب بس ممكن نكون بنختار غلط او فهمناهم غلط
تحياتى لقلمك

الحــب الجميـــل يقول...

رهيبه يا شاعر البلوجر
بس دول مش كلمتين ....
الله عليك يسلم احساسك ومشاعرك

بس اعترض على وجهة نظرك الخاصه
فيه كثير من يستحق الحب

تحيـــــاتى

mrmr يقول...

يسلم احساسك يا صعيدى

لا تفقد الامل فى ايجاد الحب فانه موجود
وعليك البحث عنه وحسن اختياره

غير معرف يقول...

ليه يا بابا
ولا حتى اانا ؟

sweet angel

أحمد الصعيدي يقول...

emymony

أكيد الحب موجود في كل الدنيا وأكيد كتير اللي يستاهل

بس فين؟

أحمد الصعيدي يقول...

الحب الجميل

شكرا يا ايمان

أكيد في كتير يستحق الحب

بس مفيش واحدة عندها استعداد انها تضحي لراجل

أحمد الصعيدي يقول...

mrmr

أنا لا أفقد الامل في الحب لأني أملكه

أحمد الصعيدي يقول...

غير معرف

حبيبة بابا

لا أنتي لا يا ست الكل

انتي ؟
هو أنا أقدر استغني عنك

برضه ده كلام

داخلالي بغير معرف

امشي يا بت أمشي

ههههههههههههههه

الحــب الجميـــل يقول...

مش عجبنى برضو رأيك ان مفيش واحده معندهاش استعداد تضحى عشان راجل

مين قال كدا ؟؟
انا مش معاك خالص المرة دى يا شاعر الهوى والعشق والتغنى بالحروف والكلمات

المرأه هى الزوجه هى الأم هى العطاء هى منبع الحنان هى الروح والقلب اللى بيخاف ويقلق عشانكم هى الامن والامان هى ............

كتير اوى يا احمد
بس لو كنت فيقالك كنت كتبت

متحطش الستات كلهم فى دايرة واحدة
وتحكم على الكل وتعمم

زى ما فيه اللى معندهوش استعداد للتضحيه
فيه اللى عندها استعداد لأخر العمر

تجربه واحده او اتنين مش مقياس للتعميم

معليش طولت عليك

تحياتى