الثلاثاء، 21 ديسمبر 2010

اذكـــرونـــي



اذكروني


لما أنسي الديار


لما يبقي صوتي مستعار


قد ما أغني بصوتي


وأحفر تراب قبري لموتي


وأفقد أدوات الحوار

اذكروني


يوم ما أكتب بإيديا


كل كلمة حب ليها


تجني شوكة حزن ليا


تحفر الحفرة العميقة


وبكل جهدها ترميني هيا



اذكروني


يوم ماتدفني الأيادي


دون ما أصرخ أو أنادي


لما أفارق حبيبتي في معادي


صرختي تسبق لهمسي


خطوتي ترجع لأمسي


وعلي سنتي أعض ف خوامسي



اذكروني


لما أعداء المحبة يدبحوني


اوعوا تنسوا ضحكتي وتمشوا بدوني


تبذروا في أرضكم الفرحة وتنزعوني


واوعوا تبكوا عليا


انا حابب الموتة ديا


اذكروني


واشكرولي حبيبتي


البلاد اللي سافرتها عشان أرجع حزين


واللي استكترت تسقي لعروقي الحنين


يارب


ماتوريني بلاد تاني


ولا تقربني من العاشقين في أوطاني


نسيني أحزاني


نشف كلام الحب في لساني


خليني أقرا عن الحب بس .. في جورناني


مش أي شئ تاني


أنا فاقد لعنواني


وكاره لكل شئ حلو إنساني


أنا عدو أحضاني

اذكروني


واذكروا فيا حنان الأم


اللي مجبرة ساعة الألم بتضم


واللي بتمحي الهم


الليل ضلام


والألم عاصر


تتعب وتروي الحب


تصبح كل يوم خاسر


ارموا التراب علي جتتي


وغمضوا عينيا


وازرعوا الصبار في أعلي قبة ليا


وابقوا قولوا مات الغبي ابن الغبية


اللي عاش يقول الحب نعمة مش خطية


واذكروني

هناك 5 تعليقات:

  1. عودة فى الخباثة بس مش عودة دائمة واوعى تتعود على كده

    Joudy

    ردحذف
  2. وكمان التعليق الأول لا ده حظ بقى كويس

    أقدر أقول إن الأسلوب القوى مش اتغير برغم صعوبة الكلام والمرار اللى فيه إلا إنك كعادتك متميز

    بعتذر حقيقى عن الانقطاع التمس لى العذر أتمنى لك الخير دوما وربنا يوفقك

    دمت بكل الخير والسعادة

    مع تحياتى

    Joudy

    ردحذف
  3. لقد احببت !!


    همس لى الكاهن : الزمى حدود الصمت


    لأن كلامك هذا معصية !



    اطرقت رأسي وهمست : بل كان شوقى اليه هو المعصية !



    دلنى كيف أتطهر وسأفعل؟!



    عبثا اغسله عن ايامى
    عبثا انتزع نفسي من حصاره
    عبثا اطفىء الجمر المشتعل فى روحى


    أصبح يسكننى
    حين اغمض عينى آراه!



    ابتى : لقد فاااااااااات الأوان
    دخل الى عروقى وانتهى الأمر !


    سيدى

    لن أقول سوى

    رحيلك يكسر أقلامنا

    سأعزف لك عزفا على اوتار الذكريات و
    سأدمي بعدك الحب حتى يتيه بين العيون
    سأقاوم برد أنفاسي
    في كُل وصـــــــلاتي
    سأبحث عن دفئ المجون تحت الجفون
    سأعاود العزف
    على يرقاتِ شفاهك
    ولو كُنت مشلوله
    هيــــــــــــــــا
    تغطرس
    تلون
    تسور كُل بحاري
    أيهُ المزاجي السرمدي

    .... ياملهمي فسكون العشق
    بات يتكاثر في ثواني

    حتى تذوب شفاهي
    بين طلاسم جفناك وعلى بساتين كلماتك


    حكاية جنون بين اوراق ذكرياتك
    لن انس مطلقا اهداء ورودى الى عينيك
    تحياتى

    ردحذف
  4. انا اسفه
    لأول مره كلماتك لأتروق لي

    ردحذف
  5. اذكروني

    يوم ما أكتب بإيديا

    كل كلمة حب ليها

    تجني شوكة حزن ليا

    تحفر الحفرة العميقة

    وبكل جهدها ترميني هيا

    موجعة

    لكن دائما انت مبدع

    ردحذف

مرحبا بكم دائما