الثلاثاء، 8 فبراير 2011

قصيدة من قلب الميدان (يحيا الشهيد)


في يوم وليلة

اتبدلت كل الخرايط في الكتب

وانتهي كل الكلام

صاح الشباب في ميدان كبير

واسع أوي مليان زحام

صاحوا وكانوا بيهتفوا

شيلوا النظام

فساد وسارح وسطنا

بقاله قول تلاتين سنة

وكمان عميل للأمريكان

هنقول لمين

إحنا الغلابة المظلومين

أصل الكلام في كلمتين

أولهم أنك أكلتنا اللحمة

مع إنها في الأصل طين

ووهمتنا بوهم السنين

ويا ما مات من بين إيديك

غلابة مطحونين

وجزارين وسباكين

وبنايين وحفارين

وسكرانين ودجالين

ناس كتييييييييييييير

منهم جهالة طيبين

ورجال كتير متعلمين

وفنانين ومثقفين

شوف إنت فين يا عمنا

وهما فين

ناس بتنعم بمليارات

وناس من قوتهم محرومين

لكن خلاص

بدأ الخلاص

نزل الشباب قلب الميدان

عشرات

 ألوف

بقم ملايين كمان

يكسروا بعزمهم جبال تميد

ويفتتوا بجهدهم تلال جليد

ويدمروا قيد الحديد

ينادوا من بعد طول غياب

ويعرفوا طريق الحلم البعيد

ويشقوا ظلام الكون ده نور

ويطلعوا من كل سور

تصحي يا مصر تفتحي

علي يوم جديد

نلم الكل حوالينا

ولي وقمص

شاب ووليد

نهتف في قلب الميدان

بأعلي صوت

يحيا الشهيد

يحيا الشهيد

يحيا الشهيد

هناك 7 تعليقات:

  1. الله ينور عليك يا شاعر

    يحيا الشهيد

    ردحذف
  2. سلامو عليكو
    وانا كمان بقول معاك
    يحيا الشهيد

    جميلة اوى وكلماتها معبرة

    لك تحياتى

    ردحذف
  3. أنحني لك احتراماً
    مبدع كعادتك يا شاعر البلوجر

    ردحذف
  4. الله جميله جدا
    يحيا الشهيد يحيا الشهيد
    كلماتك دائما في الصميم
    وشاعر بجد والله

    ردحذف
  5. في يوم وليلة
    تذوقنا طعم الحب فى يوم وليله
    طعم الكرامة والحرية فى يوم وليلة

    ربى يتم النصر لمصر ربى يتم النصر لمصر


    كلماتك طيبة ورائعة وصادقة
    كطمى النيل الطاهر

    الثورة ستوثق الحداثها بالصور والكلمات الصادقة فلا تبخلوا عليها بأى شىء ولو بقصيدة
    استمر اخى واكتب وسجل للتاريخ كل حدث وكل احساس

    جزاك الله خيرا اخى
    وان شاء الله الجاى اجمل
    وليحيا الشهيد
    يحيا الشهيد
    يحيا الشهيد

    ردحذف
  6. يحيااااااااااا الشهيد والنصر لمصر


    مبروووك والله يقدر الخير للجميع



    تحياتي لقلمك المبدع

    ردحذف

مرحبا بكم دائما