الخميس، 22 أغسطس 2013

أنا الدرويش

حبيبتي 

كل ما تتوه سكتي  

تفكرني الحاجات بيكي 

أكلمك وأعيش في أحلامك

ألاقي حروفي تغنيكي 

وتشكيلك وتشكيكي 

وأغني وأعيش وأناديلك

وأدندن في مواويلك 

 بلاد الدنيا متسعنيش

يا إنتي السحر وإنتي الأّن

وانتي الصوت وانتي الدّن 

وانتي اللي برمش عنيكي 

تاه قلبي وعقلي إتجن

إنتي الفكر وإنتي الظن

إنتي الوحي لو ييجي 

في لحظة فن

انا بلاد الدنيا متسعنيش

أنا الدرويش

أنا عيل بقلبه البكر

أنا الحلم وإنتي الفكر 

أنا الحضرة وإنتي الذكر 

أنا الفارس 

أنا الشاعر 

أنا اللي الحب علي شفتي مكتوب 

أنا النجمة في عتمة ليل 

أنا القسمة وأنا المكتوب 

أنا العاشق وأنا المحبوب 

وأنا السارح ف شريانك

عنيكي لو تضل في يوم 

تلاقي عنيا عنوانك 

أنا طفلك في أحضانك 

أنا فرحك وأحزانك 

أنا اللي بعيشلك حس جوايا 

أنا التايه في ليل شــَعرك 

وأنتي يا كل دنيايا 

أنتي التايهة ويايا

هناك 7 تعليقات:

  1. أنا القسمة وأنا المكتوب

    أنا العاشق وأنا المحبوب

    وأنا السارح ف شريانك

    عنيكي لو تضل في يوم

    تلاقي عنيا عنوانك

    أنا طفلك في أحضانك

    أنا فرحك وأحزانك

    أنا اللي بعيشلك حس جوايا

    أنا التايه في ليل شــَعرك

    وأنتي يا كل دنيايا

    أنتي التايهة ويايا

    ردحذف
  2. بجد كلماتك غذاء للروح
    شكرا...انسانة

    ردحذف
  3. غير معرف


    هكذا أتمناها لكل من يمر هنا

    ولإنسانة

    ردحذف
  4. صعيدى شكرا بجد ما اروع احساسك
    وكلماتك كل كلماتك قمة في الابداع
    جعلتنى اذوب بين السطور . شكرا
    انسانة

    ردحذف
  5. مش عارفه ازاى وصلت للقصيدة :)...من اجمل ماقرأته لك ..مش عارفه رأيي صح ولا غلط بس انا حسيت كلامك في العامية اكتر من الفصحى...قصيدة جميلة جدا

    ردحذف

مرحبا بكم دائما