الخميس، 6 يناير 2011

بنت الجيران


في يوم وليلة

أتبدلت كل اليفط

وأختفت كل الرتوش

صبحت أدور علي الحب

مابين ضلوعي

لكن للأسف .. ملقتوش

قلبي الحكيم

ناداني بأعلي صوته

الحب مات من سنين

ونسينا موته

إرجع لأيام الصبا

وإرسم حبيبتك بنت الجيران

بنت بيضة منورة

يمشي ورا خطوتها الزمان

أو إرسم عروسة من وحي الخيال

في إيدها اليمين كنوز دهب

وخاتم لازوردي في الشمال

نازل عليها شعرها

مغزول لغاية ضهرها

لونه أسود وإنجدل

من ضي القمر مليان أمل

يوماتي يرحل للغروب

يقطف من الشمس ضي النهار

ويرجع أخر الليل نوره يدوب

وإرسمها بفستان الزفاف

من غير كمام من غير كتاف

 فاتحة حضنها لشمس النهار

من غير إزاز من غير ستار

وقلبها مليان طيوب

دايما بيرحل للجنوب

يقطف من النجمة الخفيفة

ضحكها

يرميها بين الشوارع والحواري

ويغني لناسها وأهلها

وأهمسلها

 يدوب كلمتين في ودنها

بحلف بربي وربها

لا يوم لقيت

ولا هلاقي زيها

هناك تعليق واحد:

  1. بحلف بربي وربها
    لا يوم لقيت
    ولا هلاقي زيها
    ؟
    ؟
    يا عالم

    حمد لله على السلامه

    نورت البلوجر يا شاعر

    ردحذف

مرحبا بكم دائما