الأربعاء، 6 يناير، 2010

ماعدتش حبيبي


خلاص هأسيبك ولسه دمعي في عنيا

ولو تفتح بيبان الكون حواليا

ولو تزرع ألف زهرة حب

تنور بعطرها لياليا

خلاص هأسيبك

ماعدتش حبيبي ولا هأبقي في يوم حبيك

قلبي اللي كان قرب يموت

لسه بيحلم بالنهار

وضحكة بيضا منورة

زي ضحكات الصغار

ماشي بعيوني الدبلانين

شايل سنيني المجروحين

عريان البدن مجروح الجبين

وانتي عنيكي ياحبيبتي

مش حنينين ولا طيبين

وقلبك من قساوته عب طين

عمره ما ندهلي ولو حتي بسكات

ولا اداني احساس بحب ولا قاللي هات

لملمت زي الليل عضمي علي كتافي

تايه في ليل الشتا حتي القدم حافي

جايلك ياطريق بجسمي النحيف

بألضم خيطي في همي

لا عارف أقول وداع

ولا قادر من الرعشة أسمي

نص ميت .. نص صاحي

بأجهل عيون الناس

وأتوه في أطراف الضواحي

وأرحل مع الكتابة

ما أعرفش طوبة

من شهر بابة

من دون موانع أو إجابة

أنا والحب لعبة

حظها م الاساس خايب

نادر أكون أنا وحبيبتي حبايب

وساعات كتير نكون غرايب

اذا يحضر الحب لحد فينا

تلاقي التاني غايب

هناك 10 تعليقات:

Tamer Nabil يقول...

كلمات جميلة

تسلم عليها


ربنا يوفقك ويكرمك

مع خالص تحياتى

promise is promise يقول...

يا خبر ابيض ايه ده

فيه حد بالقسوه دى لا يا استاذ احمد دى حرام تكون حبيبه اصلا ولا تستهال الكلمه دى

كلماتك حلوووووه جدا

حمدلله على السلامه

جارة القمر يقول...

ياترى انت العمدة

سؤال نفسي تجاوبني عليه

كان من فترة بعيدة مدون اسمه العمدة ومش عارفة راح فين

ياترى انت هو

ليس فقيرا من يحب يقول...

راائع كالعاده يا شاعر

تسلم ايديك ويسلم فنجان الاكسبرسو

يارب تكون بخير

خواطر شابة يقول...

اذا يحضر الحب لحد فينا

تلاقي التاني غايب
انها قمة المعاناة الا تلتقي المشاعر ان يكون الحب من طرف واحد انها قمة العذاب والخروج من تلك الدوامة لايكون سهلا ابدا خسائره على المستوى النفسي تكون كبيرة
تسلم على الكلمات الجميلة
تحياتي لك

osama44 اسامه 44 يقول...

يعجز اللسان عن الكلام
تسلم ايدك

ماء تشرين يقول...

ايه الجمال ده يااحمد حلوه اوى ملايانه احساس جامد والله

ريمان يقول...

اقول ايه بس



حتى فى القصائد الحزينه واللى مليانه جرح رائع ومبدع


توحفه بجد

تسلم ايديك

عـرب بـس يقول...

مدونتك راااااااااائعة ومفيدة .. اسأل الله لك التوفيق

أتمنى منك زيارة مدونتى والتعليق فيها وإبداء رأيك
عرب بس http://arabbas.blogspot.com

اقصوصه يقول...

بين الحب والكره

بين الجروح والسعاده

تتأرجح مشاعرنا

فهي كموج البحر

لا تستقر على حال :)