الخميس، 2 فبراير، 2012

العيار فالت


أخر كلامي ليكي كلمة حب
.
هأقولهالك خلاص وأمشي
.
وأمسح دموعي من علي رمشي
.
ييجي بكرايا أو ميجيش
.
تغني دنيانا أو حتي متغنيش
.
أصبح بدونك طفل يتيم
.
أو حتي ما أتيتمشي
.
خلاص هأمشي
.
وأبقي لوحدي في الملكوت
.
وأنسي اللي حبيته
.
جناين و سكك وبيوت
.
مادمتي بتجهلي شانك
.
وبتقولي بكل غباء
.
 هديت مدنتك
.
 وكسرت صلبانك
.
وقطعت لون خضرتك
.
وحطمت جدرانك
.
وغيرت لون نيلك
.
وحرقت فدانك
.
ونسيت احساس ندهتك
.
وكرهت أحضانك
.
يا مصر وانتي أحزاني وموالي
.
وهمي زعزوتي وجرحي
.
يا دبكة حزن حسيتها
.
وفرحتلها لما خلص فرحي
.
وحبة دمع ويا الهم
.
خديهم أهم
.
متلونين بالدم
.
شايلين جراح الميدان
.
متعطرين بالسم
.
طاروا في ليلة عيد
.
ومحتاجيني أكيد
.
ورأس مالي شُـــح
.
عليل وساير بين الأهالي يكــُح
.
وناسي أحلامي
.
ماشي ضرير لكين الحزن قدامي
.
وعزوتي فني
.
عرفني في أفراحي
.
ووقت أحزاني قام إنشغل عني
.
وسابلي العيار فالت
.
وكل خاينة علي أختها مالت
.
وكل خاين ماشي يتآلت
.
وهما العدو التالت
.
وصوت الميدان بيصرخ ويندهلي
.
كل الدماء كان أصلها جهلي
.
أسمع صراخه والجرح فيا يئن
.
ولادك يا مصر كلهم أهلي
.
أنا اللي بفرحلك وأغزلك المواويل
.
أنا اللي بأحزنلك والدمع مني يسيل
.
عمري ماشفت الخيانة
.
راقدة في أرض الليل
.
غير علي ترابك
.
وموصدة بابك
.
تاكل في أحبابك
.
بأحلم بقلبي يعيش
.
فارد بطوله ع الجناح والريش
.
متزعليش
.
هييجي يوم لازم نعيش
.
نلم الكل حوالينا ونغني
.
بلدي يا بلد الغريب
.
.يا دمعة مابين الرمش والنني
.
يا قلب بين الضلوع
.
داسوا علي ترابه وخدوه مني
.
راجع أنا لنيلك
.
راكب علي خيلك
.
وأرسمك عروسة قبل الفرح تتحني
.
أوعي يطول البعد تنسيني
.
أنا اللي تراب أرض الوطن
.
أتنسج طول غربتي مني

هناك 11 تعليقًا:

sweet angel يقول...

ايه الي بيحصل ده يا بابا في البلد

أحمد الصعيدي يقول...

والله معرفش يا مروة بس الاكيد ان في ناس بتخرب فيها ومحدش عايز يسمع لصوت العقل الشباب راكبين الموجة وبيقولوا مفيش خونة وده كله كلام


ولو قلنا في خونة وناس بتقبض وناس بتخرب يقولوا بتتفرج علي القناة الاولي

حسبنا الله ونعم الوكيل

emad_abdou يقول...

بجد جسمى اشعر وانا اقرىء شعرك الجميل ,, لانه من القلب طالع ,, وفى وقت فيه الكل مجروح

emad_abdou يقول...

اسمحلى انقلها باسمك على صفحتى فى الفيس وها استنى رد حضرتك

أحمد الصعيدي يقول...

اتفضل يا باشمهندس بل تأكيد شرف ليا

ومتستأذنش تاني في اي حاجة اتفضل علي طول

ومتشكر جدا لذوقك


زعلان جدا علي اللي بيحصل

Sara يقول...

:(
عيني دمعت و أنا بقرأ

ربنا يسترها

جميلة جدًا

لـــولا وزهـــراء يقول...

.
بلدي يا بلد الغريب
.
.يا دمعة مابين الرمش والنني
.
يا قلب بين الضلوع
.
داسوا علي ترابه وخدوه مني
.
................................
ايادي خاينة باعت بخسة الوطن
وبيلعبوا بشعبها وبيسقونا كاس الحَزن
علمي ده يا مصر ولا اصبح كفن

لولا

جايدا العزيزي يقول...

كل الدماء كان أصلها جهلي

لخصت القضيه فى كلمتين

لو بس يفهموا الموج واخدنا لفين

كلامك حقيقه بجد خطير

حسبنا الله ونعم الوكيل

تحياتى

miroooo يقول...

بصراحة كلماتك جاءت على الجرح
معنديش غير انى اقول حسبى الله ونعم الوكيل

BNT ELISLAM يقول...

ازيك ياستاذى يارب تكون بخير
بس تعرف حلوالتناقض الى فى قصيده وصفت احساس البلد كلها
تحياتى لك

غير معرف يقول...


متزعليش
.
هييجي يوم لازم نعيش
.
نلم الكل حوالينا ونغني
.
بلدي يا بلد الغريب
.
.يا دمعة مابين الرمش والنني
.
يا قلب بين الضلوع
.
داسوا علي ترابه وخدوه مني
.
راجع أنا لنيلك
.
راكب علي خيلك
.
وأرسمك عروسة قبل الفرح تتحني
.
أوعي يطول البعد تنسيني
.
أنا اللي تراب أرض الوطن
.
أتنسج طول غربتي مني

روووووووعة بجد. ده وقتها فعلا
ضرورى يخرج كلام رائع زى ده للنور

دومت رائع وبخير ودام قلمك
عاشقة شعرك