الجمعة، 10 أبريل، 2009

اذكروني






اذكروني


لما أنسي الديار


لما يبقي صوتي مستعار


قد ما أغني بصوتي


وأحفر تراب قبري لموتي


وأفقد أدوات الحوار


أخرة الحب إندثار


وشه متلطخ بعار


سكتي مش سكة ساهلة


سكة أشواكها وعار (واعرة)


اذكروني


يوم ما أكتب بإيديا


كل كلمة حب ليها


تجني شوكة حزن ليا


تحفر الحفرة العميقة


وبكل جهدها ترميني هيا



اذكروني


يوم ماتدفني الأيادي


دون ما أصرخ أو أنادي


لما أفارق حبيبتي في معادي


صرختي تسبق لهمسي


خطوتي ترجع لأمسي


علي سنتي أعض ف خوامسي



اذكروني


لما أعداء المحبة يدبحوني


اوعوا تنسوا ضحكتي وتمشوا بدوني


تبذروا في أرضكم الفرحة وتنزعوني


واوعوا تبكوا عليا


انا حابب الموتة ديا


اذكروني


واشكرولي حبيبتي


البلاد اللي سافرتها علشان أرجع حزين


واللي استكترت تسقي لعروقي الحنين


يارب


ماتوريني بلاد تاني


ولا تقربني من العاشقين في أوطاني


نسيني أحزاني


نشف كلام الحب في لساني


خليني أقرا عن الحب بس .. في جورناني


مش أي شئ تاني


أنا فاقد لعنواني


وكاره لكل شئ حلو إنساني


أنا عدو أحضاني

اذكروني


واذكروا فيا حنان الأم


اللي مجبرة ساعة الألم بتضم


واللي بتمحي الهم


الليل ضلام


والألم عاصر


تتعب وتروي الحب


تصبح كل يوم خاسر


ارموا التراب علي جتتي


وغمضوا عينيا


وازرعوا الصبار في أعلي قبة ليا


وابقوا قولوا مات الغبي ابن الغبية


اللي عاش يقول الحب نعمة مش خطية


واذكروني


اذكروني


اذكروني



هناك 5 تعليقات:

اللؤلؤة يقول...

الصعيدى الهمام
السلام عليكم
ما هذا الكلام الذى قرأته أهذا كلامك
أعتقد لا
لابد أن نؤمن بأن لكل وجهة نظره ويجب إحترام كل وجهات النظر يا محترم
أما عن الشعر العامى فأنا أعشقه لأنه بيكون قريب من الفهم والقلب
وأتمنى منك ألا تنسحب لأنى أنتظر جديدك دائما
ماشى
دمت بكل الخير

dodo يقول...

السلام عليكم
ايوه كده لازم تكتب وسيبك من اى حد انا مش عارفه ايه اللى خلاك تقرر الانسحاب بس برده لا للانسحاب
وكمان عندك مواهب مدفونه اهي مخبيها ليه وبعدين اكتب ليك ولكل اللى يهتم بكتاباتك بس وربنا معاك شعرك فوق الممتاز

dodo يقول...

اه شكله ناعم
هههههههههه

عاشقة الأحزان يقول...

السلام عليكم
نورت المدونه ياجميل
مكانك محفوظ جوه قلوبنا
يارب يكرمك كل الخير وسيبك من أى حد يزعلك قولى بس وشوف انا هعمل أيه
وراك رجاله جامدين قووووووووووى
ههههههههههههههههههه
دمت مبدع
ودمت بألف خير
تقبل أحترامى الكبير
إيناس

dina يقول...

ما شاء الله
سهولة وصول الكلام لسا رغم عمق معانيه فكرنى بجاهين و على سلامة

تحياتىىىىىىىىىىىىىى