كرهت أحضانك

أخر كلامي ليكي كلمة حب

هأقولهالك خلاص وأمشي

وأمسح دموعي من علي رمشي

ييجي بكرايا أو ميجيش

تغني دنيانا أو حتي متغنيش

أصبح بدونك طفل يتيم

أو حتي ما أتيتمشي

خلاص هأمشي

وأبقي لوحدي في الملكوت

وأنسي اللي حبيته

جناين و سكك وبيوت

مادمتي بتجهلي شانك

وبتقولي بكل غباء

 هديت مدنتك

 وكسرت صلبانك

وقطعت لون خضرتك

وحطمت جدرانك

وغيرت لون نيلك

وحرقت فدانك

ونسيت احساس ندهتك

وكرهت أحضانك

يا مصر وانتي أحزاني وموالي

وهمي وعزوتي وجرحي

يا دبكة حزن حسيتها

وفرحتلها لما خلص فرحي

وحبة دمع ويا الهم

خديهم أهم

متلوثين بالدم

شايلين جراح الميدان

متعطرين بالسم

طاروا في ليلة عيد

وكفن الشهيد متمد فوق الإيد

قومي يا مصر وناديني

يمكن تحتاجيني شهيد

واتهني بشهادتي

 هتلاقي فيها إرادة

تحييكي بإرادتي

وانتي عروسة صيف

ع البحر بتخطي

وطرحتك بيضا بياض التلج

وعليها رسمة حب من خطي